ఆత్మసాక్షి

గురువు చెబుతున్నాడు...

శిష్యుడు వింటున్నాడు....

"ఒక ఊరిలో ఒక ధనిక వ్యాపారి అద్భుతమైన భవనాన్ని కట్టించాడు. పాలరాతి ఫ్లోరింగ్, అందమైన గవాక్షాలు, అద్భుతమైన నగిషీలు, కళ్లు మిరుమిట్లు గొలిపే అలంకరణలు... ఇలా ఏ కోణం నుంచి చూసినా ఆ భవనానికి సాటిలేదు"

శిష్యుడు ఆసక్తిగా వింటున్నాడు.

" ఆ ఇంట్లో మాత్రం కుక్కలు, గాడిదలు, పందులు, ఎలకలు నివాసముంటున్నాయి. ఇల్లు పాడుబడిపోతోంది"
" ఆ ఇంటికి కాపలా లేదేమో"

"అవును నాయనా... అదే నిజం"

"ఇంతకీ ఆ ఇల్లు ఎక్కడుంది గురువుగారూ" ఉండబట్టలేక శిష్యుడు అడిగేశాడు.

"మన శరీరమే ఆ భవనం నాయనా. దీనికి ఎనలేని అందం ఉంది. అన్ని అవయవాలు, ఎన్నో వ్యవస్థలూ ఉన్నాయి. కానీ కాపలా సరిగ్గా లేదు. అందుకే కామమనే కుక్క, క్రోధమనే గాడిద, లోభమనే పంది, మోహమనే ఎలకా ఈ దేహ భవనంలో కాపురం చేస్తున్నాయి."

"మరి కాపలాదారుడెవరు గురువుగారూ"

"ఆత్మసాక్షి నాయనా"


చిలక మాట్లాడింది!

ఒంటరితనం పోగొట్టుకోవడానికి ఒకతను మాట్లాడే చిలుకను కొనుక్కొని వచ్చాడు.

ఆ మర్నాడు అతను నీరసంగా దుకాణానికి తిరిగివచ్చాడు.

"ఈ చిలుక అస్సలు మాట్లాడటం లేదు" అని చెప్పాడు.

"అరే... చిలక మాట్లాడి తీరాలే.... ఒక పనిచేయండి. ఈ బుల్లి నిచ్చెన తీసుకువెళ్లండి. పంజరంలో పెడితే దీనిపైకి చిలక ఎక్కుతుంది. హాయిగా మాట్లాడుతుంది" అన్నాడు దుకాణదారు.

ఆ మరుసటిరోజు వ్యక్తి మళ్లీ తిరిగి వచ్చాడు.

"ఈ రోజూ చిలక మాట్లాడలేదు"

"అలాగా... అయితే ఈ అద్దం తీసుకువెళ్లండి. నిచ్చెన ఎక్కి, అద్దంలో తనను తాను చూసుకుని చిలక మాట్లాడుతుంది"

ఆ మరుసటి రోజు వ్యక్తి మళ్లీ హాజరు.

"చిలక ఎగిరిపోయింది"

"అయ్యో...ఒక్క మాట కూడా మాట్లాడలేదా?"

"మాట్లాడింది"

"ఏం మాట్లాడింది?"

"మూర్ఖుడా... ఇన్ని కొంటావు కానీ ఒక జాంపండు కొనాలన్న తెలివి లేదా? "